zauq-e-parwaz ki itni to pazirai kar

zauq-e-parvāz kī itnī to pazīrā.ī kar

par-shikasta huuñ jo maiñ hausla-afzā.ī kar

dil-e-ḳhush-fahm ko de phir koī ḳhush-rang fareb

phir kisī rasm se tajdīd-e-shanāsā.ī kar

koī ḳhurshīd bhī manzar kā muqaddar kar de

sirf raushan na ye bujhtī huī bīnā.ī kar

kaun samjhegā tire karb kā mafhūm yahāñ

ghar kī dīvāroñ ko ab mahram-e-tanhā.ī kar

naqd-e-jāñ chhīn magar shīsha-e-pindār na toḌ

zaḳhm de mujh ko na ehsān-e-masīhā.ī kar

kuchh tire tarz-e-amal par bhī to harf aa.egā

mere kirdār kī itnī bhī na rusvā.ī kar

apnī rusvā.ī ko duniyā kī nazar se dekhūñ

is tamāshe meñ kabhī mujh ko tamāshā.ī kar

yūñhī rakh le mirī derīna rifāqat kā bharam

apnī tanhā.ī meñ shāmil mirī tanhā.ī kar

zauq-e-parwaz ki itni to pazirai kar

par-shikasta hun jo main hausla-afzai kar

dil-e-KHush-fahm ko de phir koi KHush-rang fareb

phir kisi rasm se tajdid-e-shanasai kar

koi KHurshid bhi manzar ka muqaddar kar de

sirf raushan na ye bujhti hui binai kar

kaun samjhega tere karb ka mafhum yahan

ghar ki diwaron ko ab mahram-e-tanhai kar

naqd-e-jaan chhin magar shisha-e-pindar na toD

zaKHm de mujh ko na ehsan-e-masihai kar

kuchh tere tarz-e-amal par bhi to harf aaega

mere kirdar ki itni bhi na ruswai kar

apni ruswai ko duniya ki nazar se dekhun

is tamashe mein kabhi mujh ko tamashai kar

yunhi rakh le meri derina rifaqat ka bharam

apni tanhai mein shamil meri tanhai kar