zauq-e-sujud le gaya mujhko kahan kahan

zauq-e-sujūd le gayā mujh ko kahāñ kahāñ

lekin mire nasīb meñ vo āstāñ kahāñ

baḳhshā hai tere naqsh-e-qadam ne jo ḳhāk-e-kū

vo husn-e-dil-navāz sar-e-kahkashāñ kahāñ

maiñ sochtā huuñ āriz-o-gesū ko dekh kar

Thahregā sub.h-o-shām kā ye kārvāñ kahāñ

ḳhud se bhī ho sakī na mulāqāt umr-bhar

apnī talāsh le ga.ī mujh ko kahāñ kahāñ

ījād kar rahe haiñ vo jaur-o-sitam na.e

jaur-o-sitam se dabtā hai azm-e-javāñ kahāñ

merī nigāh-e-shauq gadāgar banī huī

jalvoñ kī bhiik maañg rahī hai kahāñ kahāñ

hai baaz yuuñ to ab bhī dar-e-mai-kada 'nadīm'

pahlī sī vo navāzish-e-pīr-e-muġhāñ kahāñ

zauq-e-sujud le gaya mujh ko kahan kahan

lekin mere nasib mein wo aastan kahan

baKHsha hai tere naqsh-e-qadam ne jo KHak-e-ku

wo husn-e-dil-nawaz sar-e-kahkashan kahan

main sochta hun aariz-o-gesu ko dekh kar

Thahrega subh-o-sham ka ye karwan kahan

KHud se bhi ho saki na mulaqat umr-bhar

apni talash le gai mujh ko kahan kahan

ijad kar rahe hain wo jaur-o-sitam nae

jaur-o-sitam se dabta hai azm-e-jawan kahan

meri nigah-e-shauq gadagar bani hui

jalwon ki bhik mang rahi hai kahan kahan

hai baz yun to ab bhi dar-e-mai-kada 'nadim'

pahli si wo nawazish-e-pir-e-mughan kahan