zauq-e-suKHan ko ab to tere aag lagana achchha hai

zauq-e-suḳhan ko ab to tere aag lagānā achchhā hai

muflis ghar kī hālat hai aur sher sunānā achchhā hai

merī sachchī chāhat dekhī kah baiThā vo mahfil meñ

mere sab dīvānoñ meñ se ye dīvāna achchhā hai

tīr-e-nazar se aisā maare dil kā panchhī taab na le

duniyā ghar ke sayyādoñ se us kā nishāna achchhā hai

shaiḳh to masjid meñ jaatā hai andar se dil kaalā hai

sachche aabid jahāñ khaḌe huuñ vo but-ḳhāna achchhā hai

aisī chaal kahāñ duuje kī kyuuñ tū aisā kahtā hai

vaise tū ne parde meñ mujh ko pahchānā achchhā hai

auroñ ko talqīn kare hai lekin 'sarvar' nāseh kā

mai-ḳhāne meñ chupke chupke ānā-jānā achchhā hai

zauq-e-suKHan ko ab to tere aag lagana achchha hai

muflis ghar ki haalat hai aur sher sunana achchha hai

meri sachchi chahat dekhi kah baiTha wo mahfil mein

mere sab diwanon mein se ye diwana achchha hai

tir-e-nazar se aisa mare dil ka panchhi tab na le

duniya ghar ke sayyaadon se us ka nishana achchha hai

shaiKH to masjid mein jata hai andar se dil kala hai

sachche aabid jahan khaDe hun wo but-KHana achchha hai

aisi chaal kahan duje ki kyun tu aisa kahta hai

waise tu ne parde mein mujh ko pahchana achchha hai

auron ko talqin kare hai lekin 'sarwar' naseh ka

mai-KHane mein chupke chupke aana-jaana achchha hai