zawal-e-fikr ko zehnon ki tirgi kahte

zavāl-e-fikr ko zehnoñ kī tīrgī kahte

jo baat ham ne kahī hai vo aap bhī kahte

farāz-e-dār pa rūdād-e-zindagī kahte

ḳhudā-shanās jo hote to vāqa.ī kahte

taras rahe haiñ jo rāhat kī zindagī ke liye

vo kaise ġham ko masarrat kī zindagī kahte

ab aise log zamāne se uTh ga.e shāyad

tumhāre ġham ko jo sarmāya-e-ḳhushī kahte

ye fikr-e-nau ke pujārī ye raushnī ke amiiñ

jo raushnī kahīñ hotī to raushnī kahte

bahut talāsh kiyā ham ne shahr-e-ġham meñ magar

milā na koī jo rūdād-e-zindagī kahte

jo kaam ahl-e-junūñ ne kiyā ba-nām-e-vafā

shu.ūr-mañd use rūh-e-āgahī kahte

jo kam-nazar the aqīdat ko dete kufr kā naam

vafā-parast aqīdat ko bandagī kahte

ye ahl-e-fikr ye fan-kār daur-e-hāzir ke

ġhazal ke naam se duniyā kī baat bhī kahte

mire junūñ ke taqāze agar samajh lete

mirī ḳhudī ko vo me.arāj-e-be-ḳhudī kahte

'nigār' kaash ye aish-o-tarab ke dīvāne

sitam-zadoñ kī kahānī kabhī kabhī kahte

zawal-e-fikr ko zehnon ki tirgi kahte

jo baat hum ne kahi hai wo aap bhi kahte

faraaz-e-dar pa rudad-e-zindagi kahte

KHuda-shanas jo hote to waqai kahte

taras rahe hain jo rahat ki zindagi ke liye

wo kaise gham ko masarrat ki zindagi kahte

ab aise log zamane se uTh gae shayad

tumhaare gham ko jo sarmaya-e-KHushi kahte

ye fikr-e-nau ke pujari ye raushni ke amin

jo raushni kahin hoti to raushni kahte

bahut talash kiya hum ne shahr-e-gham mein magar

mila na koi jo rudad-e-zindagi kahte

jo kaam ahl-e-junun ne kiya ba-nam-e-wafa

shuur-mand use ruh-e-agahi kahte

jo kam-nazar the aqidat ko dete kufr ka nam

wafa-parast aqidat ko bandagi kahte

ye ahl-e-fikr ye fan-kar daur-e-hazir ke

ghazal ke nam se duniya ki baat bhi kahte

mere junun ke taqaze agar samajh lete

meri KHudi ko wo mearaj-e-be-KHudi kahte

'nigar' kash ye aish-o-tarab ke diwane

sitam-zadon ki kahani kabhi kabhi kahte