zawal-e-sham-e-hijran ka ishaara dekhta hun main

zavāl-e-shām-e-hijrāñ kā ishāra dekhtā huuñ maiñ

charāġhoñ ke badan ko pāra-pāra dekhtā huuñ maiñ

matā’-e-jāñ luTā dene se kuchh hāsil nahīñ hotā

to kyoñ sūd-o-ziyāñ kā goshvārā dekhtā huuñ maiñ

tamanna kā natīja apne sar lenā nahīñ achchhā

zarā Thahro 'azīzo istiḳhāra dekhtā huuñ maiñ

mirī ḳhāk-e-badan āḳhir isī miTTī kā hissa hai

so kashtī kholtā huuñ aur kināra dekhtā huuñ maiñ

ġhubār-e-shab ke pīchhe raushnī hai log kahte haiñ

agar yuuñ hai to ye manzar dobāra dekhtā huuñ maiñ

añdheroñ meñ kuchh aise ḳhvāb bhī dikhlā.ī dete haiñ

ki jaise āsmāñ par ik sitāra dekhtā huuñ maiñ

zawal-e-sham-e-hijran ka ishaara dekhta hun main

charaghon ke badan ko para-para dekhta hun main

mata’-e-jaan luTa dene se kuchh hasil nahin hota

to kyon sud-o-ziyan ka goshwara dekhta hun main

tamanna ka natija apne sar lena nahin achchha

zara Thahro 'azizo istiKHara dekhta hun main

meri KHak-e-badan aaKHir isi miTTi ka hissa hai

so kashti kholta hun aur kinara dekhta hun main

ghubar-e-shab ke pichhe raushni hai log kahte hain

agar yun hai to ye manzar dobara dekhta hun main

andheron mein kuchh aise KHwab bhi dikhlai dete hain

ki jaise aasman par ek sitara dekhta hun main