زوال شام ہجراں کا اشارہ دیکھتا ہوں میں

زوال شام ہجراں کا اشارہ دیکھتا ہوں میں

چراغوں کے بدن کو پارہ پارہ دیکھتا ہوں میں

متاع جاں لٹا دینے سے کچھ حاصل نہیں ہوتا

تو کیوں سود و زیاں کا گوشوارا دیکھتا ہوں میں

تمنا کا نتیجہ اپنے سر لینا نہیں اچھا

ذرا ٹھہرو عزیزو استخارہ دیکھتا ہوں میں

مری خاک بدن آخر اسی مٹی کا حصہ ہے

سو کشتی کھولتا ہوں اور کنارہ دیکھتا ہوں میں

غبار شب کے پیچھے روشنی ہے لوگ کہتے ہیں

اگر یوں ہے تو یہ منظر دوبارہ دیکھتا ہوں میں

اندھیروں میں کچھ ایسے خواب بھی دکھلائی دیتے ہیں

کہ جیسے آسماں پر اک ستارہ دیکھتا ہوں میں