zawal-e-umr ke parde mein hai hijab kahan

zavāl-e-umr ke parde meñ hai hijāb kahāñ

vufūr-e-shauq se labrez ab gulāb kahāñ

kiran kiran se fasāna hasīn likhtā thā

chalā gayā vo fusūñ kār-e-āfatāb kahāñ

numūd-e-sub.h ko detā sadā chalā aa.e

hamārī raat meñ baaqī hai aisā ḳhvāb kahāñ

har ik qadam pe ḳhirad ke nishān milte haiñ

tujhe chhupā ke maiñ rakkhūñ dil-e-ḳharāb kahāñ

sunahre vaqt meñ reg-e-ravāñ ye phuul khilā

vo qissa pyaar kā le kar ga.e haiñ ḳhvāb kahāñ

siyah safed ghaTā āsmāñ pe phailī thī

par us ke jaal meñ aayā vo māhtāb kahāñ

taġhayyurāt zamāne ke us ne batlā.e

mire savāl ke haq meñ thā vo javāb kahāñ

talāsh ḳhvāb meñ mere qadam vo letā thā

zabāñ pe us kī hai ab aap aur janāb kahāñ

sadā-e-dard se vāqif dil-e-nafas 'ja.afar'

koī batā.e ki hotā hai dastiyāb kahāñ

zawal-e-umr ke parde mein hai hijab kahan

wufur-e-shauq se labrez ab gulab kahan

kiran kiran se fasana hasin likhta tha

chala gaya wo fusun kar-e-afatab kahan

numud-e-subh ko deta sada chala aae

hamari raat mein baqi hai aisa KHwab kahan

har ek qadam pe KHirad ke nishan milte hain

tujhe chhupa ke main rakkhun dil-e-KHarab kahan

sunahre waqt mein reg-e-rawan ye phul khila

wo qissa pyar ka le kar gae hain KHwab kahan

siyah safed ghaTa aasman pe phaili thi

par us ke jal mein aaya wo mahtab kahan

taghayyuraat zamane ke us ne batlae

mere sawal ke haq mein tha wo jawab kahan

talash KHwab mein mere qadam wo leta tha

zaban pe us ki hai ab aap aur janab kahan

sada-e-dard se waqif dil-e-nafas 'jafar'

koi batae ki hota hai dastiyab kahan