zeb-e-gulshan na bane raunaq-e-virana bane

zeb-e-gulshan na bane raunaq-e-vīrāna bane

kitne hoshyār the jo ishq meñ dīvāna bane

jur.at-e-dīd agar merī tamāsha na bane

dar-haqīqat mirā afsāna phir afsāna bane

kuchh patañgoñ hī pe mauqūf nahīñ jān-e-vafā

jo bhī aa jaa.e tirī bazm meñ parvāna bane

kitne dilchasp haiñ us shoḳh-nazar ke andāz

koī dīvāna na bantā ho to dīvāna bane

dil ḳhulūs-e-ġham-e-ulfat se hai ḳhālī varna

ishq afsāna banā kar bhī na afsāna bane

dil kī duniyā kī ulaT pher ilāhī tauba

jitnā ābād kiyā jaa.e ye vīrāna bane

kaash ik rabt rahe un kī nazar se 'bismil'

kabhī ā.īna bane dil kabhī paimāna bane

zeb-e-gulshan na bane raunaq-e-virana bane

kitne hoshyar the jo ishq mein diwana bane

jurat-e-did agar meri tamasha na bane

dar-haqiqat mera afsana phir afsana bane

kuchh patangon hi pe mauquf nahin jaan-e-wafa

jo bhi aa jae teri bazm mein parwana bane

kitne dilchasp hain us shoKH-nazar ke andaz

koi diwana na banta ho to diwana bane

dil KHulus-e-gham-e-ulfat se hai KHali warna

ishq afsana bana kar bhi na afsana bane

dil ki duniya ki ulaT pher ilahi tauba

jitna aabaad kiya jae ye virana bane

kash ek rabt rahe un ki nazar se 'bismil'

kabhi aaina bane dil kabhi paimana bane