zehn be-samt KHayalon ka nishana hai yahan

zehn be-samt ḳhayāloñ kā nishāna hai yahāñ

zindagī jaise yūñhī Thokareñ khānā hai yahāñ

naġhma nauha hai yahāñ chīḳh tarāna hai yahāñ

baat sau Dhang se karne kā bahāna hai yahāñ

qahqaha apnī tabāhī pe lagānā hai yahāñ

is ḳhazāna ko bahar-hāl luTānā hai yahāñ

kal kutub-ḳhānoñ kī ham log bhī raunaq hoñge

har haqīqat ke muqaddar meñ fasāna hai yahāñ

is ḳharābe se nikal kar lab-e-dariyā kyā jaa.eñ

ek qatre meñ samundar kā fasānā hai yahāñ

kaise be-harf-o-sadā dard kī rūdād kaheñ

ek ek lafz to sadiyoñ kā purānā hai yahāñ

ghar se ghabrā ke jo niklā to ye bolī dahlīz

paañv shal hoñge to phir lauT ke aanā hai yahāñ

har taraf soch meñ Duube hue yaksāñ chehre

jaise har chaar taraf ā.īna-ḳhāna hai yahāñ

zehn be-samt KHayalon ka nishana hai yahan

zindagi jaise yunhi Thokaren khana hai yahan

naghma nauha hai yahan chiKH tarana hai yahan

baat sau Dhang se karne ka bahana hai yahan

qahqaha apni tabahi pe lagana hai yahan

is KHazana ko bahar-haal luTana hai yahan

kal kutub-KHanon ki hum log bhi raunaq honge

har haqiqat ke muqaddar mein fasana hai yahan

is KHarabe se nikal kar lab-e-dariya kya jaen

ek qatre mein samundar ka fasana hai yahan

kaise be-harf-o-sada dard ki rudad kahen

ek ek lafz to sadiyon ka purana hai yahan

ghar se ghabra ke jo nikla to ye boli dahliz

panw shal honge to phir lauT ke aana hai yahan

har taraf soch mein Dube hue yaksan chehre

jaise har chaar taraf aaina-KHana hai yahan