zehn ka kuchh muntashir to haal ka KHasta raha

zehn kā kuchh muntashir to haal kā ḳhasta rahā

kitnā merī zaat se vo shaḳhs vābasta rahā

sub.h-e-kāzib raushnī ke jaal meñ aane lagī

sīm-gūñ sūraj ujāle par kamar-basta rahā

dekhne meñ kuchh huuñ maiñ mahsūs karne meñ huuñ kuchh

chashm-e-bīnā par mirā ye raaz sar-basta rahā

apne zindāñ se nikalnā apnī tāqat meñ nahīñ

har bashar apne liye zanjīr pā-basta rahā

pursish-e-ġham meñ na mujh se hī mahz ujlat huī

us kī āñkhoñ kā chhalak paḌnā bhī barjasta rahā

apne andar kī ḳhalish kā kar liyā maiñ ne ilaaj

mere dil meñ dūsroñ kā dard paivasta rahā

yā masā.il se taqābul zindagī se yā farār

bach nikalne kā vahāñ se ek hī rasta rahā

zehn ka kuchh muntashir to haal ka KHasta raha

kitna meri zat se wo shaKHs wabasta raha

subh-e-kazib raushni ke jal mein aane lagi

sim-gun suraj ujale par kamar-basta raha

dekhne mein kuchh hun main mahsus karne mein hun kuchh

chashm-e-bina par mera ye raaz sar-basta raha

apne zindan se nikalna apni taqat mein nahin

har bashar apne liye zanjir pa-basta raha

pursish-e-gham mein na mujh se hi mahz ujlat hui

us ki aankhon ka chhalak paDna bhi barjasta raha

apne andar ki KHalish ka kar liya main ne ilaj

mere dil mein dusron ka dard paiwasta raha

ya masail se taqabul zindagi se ya farar

bach nikalne ka wahan se ek hi rasta raha