ذہن کی آوارگی کو اس قدر پیارا ہوں میں

ذہن کی آوارگی کو اس قدر پیارا ہوں میں

ساتھ چلتی ہے مرے اک ایسا بنجارہ ہوں میں

راکھ نے میری ہی ڈھک رکھا ہے مجھ کو آج کل

ورنہ تو خود میں سلگتا ایک انگارہ ہوں میں

زندگی کی کشمکش نے سوکھ لی ساری مٹھاس

میں سمندر ہوں مگر بے انتہا کھارا ہوں میں

اپنے پن کے ریشمی دھاگے سے مجھ کو باندھ لے

تو مرا آکاش ہے تیرا ہی دھرو تارا ہوں میں

آپ کی سانسیں ملیں تو کھل اٹھا پورا وجود

ورنہ میرا کیا ہے اک چھوٹا سا غبارہ ہوں میں

میں وہ بادل ہوں کہ جس کے دم سے خوشحالی ہے نازؔ

پھر بھی یہ الزام لگتے ہیں کہ آوارہ ہوں میں