zehn ki aawargi ko is qadar pyara hun main

zehn kī āvārgī ko is qadar pyārā huuñ maiñ

saath chaltī hai mire ik aisā banjāra huuñ maiñ

raakh ne merī hī Dhak rakkhā hai mujh ko āj-kal

varna to ḳhud meñ sulagtā ek angāra huuñ maiñ

zindagī kī kashmakash ne sokh lī saarī miThās

maiñ samundar huuñ magar be-intihā khārā huuñ maiñ

apne-pan ke reshmī dhāge se mujh ko bāñdh le

tū mirā ākāsh hai terā hī dhruv taarā huuñ maiñ

aap kī sāñseñ milīñ to khil uThā puurā vujūd

varna merā kyā hai ik chhoTā sā ġhubbāra huuñ maiñ

maiñ vo bādal huuñ ki jis ke dam se ḳhush-hālī hai 'nāz'

phir bhī ye ilzām lagte haiñ ki āvāra huuñ maiñ

zehn ki aawargi ko is qadar pyara hun main

sath chalti hai mere ek aisa banjara hun main

rakh ne meri hi Dhak rakkha hai mujh ko aaj-kal

warna to KHud mein sulagta ek angara hun main

zindagi ki kashmakash ne sokh li sari miThas

main samundar hun magar be-intiha khaara hun main

apne-pan ke reshmi dhage se mujh ko bandh le

tu mera aakash hai tera hi dhruw tara hun main

aap ki sansen milin to khil uTha pura wujud

warna mera kya hai ek chhoTa sa ghubbara hun main

main wo baadal hun ki jis ke dam se KHush-haali hai 'naz'

phir bhi ye ilzam lagte hain ki aawara hun main