zehn-o-dil mein basi hain diwaren

zehn-o-dil meñ basī haiñ dīvāreñ

jaane kab se khaḌī haiñ dīvāreñ

dhuup utre bhī kaise āñgan meñ

har taraf to khaḌī haiñ dīvāreñ

sahn meñ ek bhī nahīñ dīvār

zehn meñ uTh rahī haiñ dīvāreñ

do sage bhā.iyoñ kā jhagḌā hai

faisla kar rahī haiñ dīvāreñ

merā chehra mujhe dikhātī haiñ

aa.ina ban ga.ī haiñ dīvāreñ

kachchī miTTī ke mere ghar ke liye

āñdhiy.oñ se laḌī haiñ dīvāreñ

kaan dhar kar suno ki sadiyoñ kī

dāstāñ kah rahī haiñ dīvāreñ

aisī dīvāreñ sāmne haiñ mire

jin ke pīchhe khaḌī haiñ dīvāreñ

merā qad bhī bahut baḌā hai magar

mere qad se baḌī haiñ dīvāreñ

'ābid' uḌne kā ḳhvāb kyā dekheñ

har taraf to khaḌī haiñ dīvāreñ

zehn-o-dil mein basi hain diwaren

jaane kab se khaDi hain diwaren

dhup utre bhi kaise aangan mein

har taraf to khaDi hain diwaren

sahn mein ek bhi nahin diwar

zehn mein uTh rahi hain diwaren

do sage bhaiyon ka jhagDa hai

faisla kar rahi hain diwaren

mera chehra mujhe dikhati hain

aaina ban gai hain diwaren

kachchi miTTi ke mere ghar ke liye

aandhiyon se laDi hain diwaren

kan dhar kar suno ki sadiyon ki

dastan kah rahi hain diwaren

aisi diwaren samne hain mere

jin ke pichhe khaDi hain diwaren

mera qad bhi bahut baDa hai magar

mere qad se baDi hain diwaren

'abid' uDne ka KHwab kya dekhen

har taraf to khaDi hain diwaren