zehn-o-dil mein hai jang ya kuchh aur

zehn-o-dil meñ hai jañg yā kuchh aur

ho rahā huuñ malañg yā kuchh aur

haal kyā ho gayā samā.at kā

terī bāteñ thiiñ sañg yā kuchh aur

koī utrā hai jhiil meñ dil kī

uTh rahī hai tarañg yā kuchh aur

tere hāthoñ meñ Dor hai yā dil

ho gayā huuñ patañg yā kuchh aur

koshisheñ rā.egāñ manāne kī

mujh ko hī thā na Dhañg yā kuchh aur

mushkileñ roz baḌhtī jaatī haiñ

vo sitamgar hai tañg yā kuchh aur

dil meñ hai aas aarzū vahshat

be-qarārī umañg yā kuchh aur

hausle mere misl koh hue

terī chāhat hai sañg yā kuchh aur

mere sheroñ pe ho ga.e sākit

yaar mere haiñ dañg yā kuchh aur

un ke hāthoñ meñ āj-kal 'rāġhib'

hai rifāqat kā rañg yā kuchh aur

zehn-o-dil mein hai jang ya kuchh aur

ho raha hun malang ya kuchh aur

haal kya ho gaya samaat ka

teri baaten thin sang ya kuchh aur

koi utra hai jhil mein dil ki

uTh rahi hai tarang ya kuchh aur

tere hathon mein Dor hai ya dil

ho gaya hun patang ya kuchh aur

koshishen raegan manane ki

mujh ko hi tha na Dhang ya kuchh aur

mushkilen roz baDhti jati hain

wo sitamgar hai tang ya kuchh aur

dil mein hai aas aarzu wahshat

be-qarari umang ya kuchh aur

hausle mere misl koh hue

teri chahat hai sang ya kuchh aur

mere sheron pe ho gae sakit

yar mere hain dang ya kuchh aur

un ke hathon mein aaj-kal 'raghib'

hai rifaqat ka rang ya kuchh aur