ذہن پامال گزر گاہوں پہ چلنا دشوار

ذہن پامال گزر گاہوں پہ چلنا دشوار

اور اس بھیڑ سے بچ کر بھی نکلنا دشوار

سوچتے رہنے سے حالات بدلنا دشوار

اور خوابوں کے جزیروں سے نکلنا دشوار

کیا بیاں کیجئے اندوہ غریب الوطنی

صورت حال کا الفاظ میں ڈھلنا دشوار

سر میں شوریدگی ایسی کہ ٹھہرنا مشکل

پاؤں میں آبلے اتنے ہیں کہ چلنا دشوار

چند شمعوں سے اجالا نہیں ہونے والا

ایسی آندھی ہے کہ سورج کا بھی جلنا دشوار

جب اسے یاد کیا کھل اٹھے گلہائے نشاط

ہم سمجھتے تھے بلاؤں کا ہے ٹلنا دشوار