zehn pamal guzargahon pe chalna dushwar

zehn pāmāl guzargāhoñ pe chalnā dushvār

aur is bhiiḌ se bach kar bhī nikalnā dushvār

sochte rahne se hālāt badalnā dushvār

aur ḳhvāboñ ke jazīroñ se nikalnā dushvār

kyā bayāñ kījiye andoh-e-ġharīb-ul-vatanī

sūrat-e-hāl kā alfāz meñ Dhalnā dushvār

sar meñ shorīdgī aisī ki Thaharnā mushkil

paañv meñ aable itne haiñ ki chalnā dushvār

chand sham.oñ se ujālā nahīñ hone vaalā

aisī āñdhī hai ki sūraj kā bhī jalnā dushvār

jab use yaad kiyā khil uThe gul-hā-e-nashāt

ham samajhte the balāoñ kā hai Talnā dushvār

zehn pamal guzargahon pe chalna dushwar

aur is bhiD se bach kar bhi nikalna dushwar

sochte rahne se haalat badalna dushwar

aur KHwabon ke jaziron se nikalna dushwar

kya bayan kijiye andoh-e-gharib-ul-watani

surat-e-haal ka alfaz mein Dhalna dushwar

sar mein shoridgi aisi ki Thaharna mushkil

panw mein aable itne hain ki chalna dushwar

chand shamon se ujala nahin hone wala

aisi aandhi hai ki suraj ka bhi jalna dushwar

jab use yaad kiya khil uThe gul-ha-e-nashat

hum samajhte the balaon ka hai Talna dushwar