zehn par jab dard KHamoshi ki chadar tanta hai

zehn par jab dard ḳhāmoshī kī chādar tāntā hai

qatra qatra aañkh se lafz-o-ma.ānī chhāntā hai

har kas-o-nā-kas ko raas aatī nahīñ āvāra-gardī

rāste us par hī khulte haiñ jo chalnā jāntā hai

naqsh-e-pārīna haTā kar maiñ na.e paikar tarāshūñ

kūza-gar kankar haTā kar jaise miTTī sāntā hai

vo hai dīvāna use gumnāmī o tash.hīr se kyā

ḳhāmushī se kar guzartā hai jo dil meñ Thāntā hai

kor-chashmī ne bikherā husn kā shīrāza varna

ishtihārī jism bhī poshīdgī ko māntā hai

ye sila bhī kam nahīñ 'āzim' tirī mashq-e-suḳhan kā

koī ġhazloñ ke havāle se tujhe pahchāntā hai

zehn par jab dard KHamoshi ki chadar tanta hai

qatra qatra aankh se lafz-o-maani chhanta hai

har kas-o-na-kas ko ras aati nahin aawara-gardi

raste us par hi khulte hain jo chalna jaanta hai

naqsh-e-parina haTa kar main nae paikar tarashun

kuza-gar kankar haTa kar jaise miTTi santa hai

wo hai diwana use gumnami o tashhir se kya

KHamushi se kar guzarta hai jo dil mein Thanta hai

kor-chashmi ne bikhera husn ka shiraaza warna

ishtihaari jism bhi poshidgi ko manta hai

ye sila bhi kam nahin 'azim' teri mashq-e-suKHan ka

koi ghazlon ke hawale se tujhe pahchanta hai