zer-e-naqab aab-gun hae-re unki jaliyan

zer-e-naqāb āb-gūñ hā.e-re un kī jāliyāñ

ham ko to bas Dubo ga.iiñ niil ke kaTre vāliyāñ

teġh jo rakkhī saan par sudh jo sambhālī us ne Tuk

vaza.eñ na.ī tarāshiyāñ tarzeñ na.ī nikāliyāñ

ham pe to barse sub.h tak ḳhanjar o teġh o tiir hī

abr-e-balā se kam nahīñ hijr kī rāteñ kāliyāñ

shole kī juuñ madad kare dūd-e-naḳhast-e-ḳhār-o-ḳhas

missī se aur dhuāñ huiiñ hoñToñ kī us kī lāliyāñ

mū-kamarān-e-bāġh-e-husn lachkeñ jo misl-e-shāḳh-e-bed

dil ko na kyuuñ hilāveñ phir un kī ye nau-nahāliyāñ

ik sharar-e-āh kā mirī bā.is-e-shor-o-shar huā

jugnū ko dekh jis tarah laḌke bajāveñ tāliyāñ

sāhib-e-ne.amat is tarah rahte haiñ sab se surḳh-rū

sū-e-zamīñ jhukī raheñ meve kī jaise Dāliyāñ

kis se paḌhāve koī ḳhat inshā hī jis kā ho ġhalat

ya.anī ki us ne be-nuqat bhejī haiñ likh ke gāliyāñ

kunj-e-qafas meñ baaġh se aa.e the jo na.e asiir

sauteñ unhoñ kī saarī raat mere jigar meñ sāliyāñ

'mus.hafī' us kī bazm meñ bhūke haiñ naaz ke jo log

gāliyoñ kī jagah unhoñ miltī haiñ kyā sahāliyāñ

zer-e-naqab aab-gun hae-re un ki jaliyan

hum ko to bas Dubo gain nil ke kaTre waliyan

tegh jo rakkhi san par sudh jo sambhaali us ne Tuk

wazaen nai tarashiyan tarzen nai nikaliyan

hum pe to barse subh tak KHanjar o tegh o tir hi

abr-e-bala se kam nahin hijr ki raaten kaliyan

shole ki jun madad kare dud-e-naKHast-e-KHar-o-KHas

missi se aur dhuan huin honTon ki us ki laliyan

mu-kamaran-e-bagh-e-husn lachken jo misl-e-shaKH-e-bed

dil ko na kyun hilawen phir un ki ye nau-nahaaliyan

ek sharar-e-ah ka meri bais-e-shor-o-shar hua

jugnu ko dekh jis tarah laDke bajawen taliyan

sahib-e-neamat is tarah rahte hain sab se surKH-ru

su-e-zamin jhuki rahen mewe ki jaise Daliyan

kis se paDhawe koi KHat insha hi jis ka ho ghalat

yani ki us ne be-nuqat bheji hain likh ke galiyan

kunj-e-qafas mein bagh se aae the jo nae asir

sauten unhon ki sari raat mere jigar mein saliyan

'mushafi' us ki bazm mein bhuke hain naz ke jo log

galiyon ki jagah unhon milti hain kya sahaaliyan