zer-e-zamin hun tishna-e-didar-e-yar ka

zer-e-zamīñ huuñ tishna-e-dīdār-e-yār kā

aalam vahī hai aaj talak intizār kā

guzrā sharāb piine se le kaun dard-e-sar

saaqī dimāġh kis ko hai ranj-e-ḳhumār kā

mahshar ke roz bhī na khulegī hamārī aañkh

sadma uThā chuke haiñ shab-e-intizār kā

ibrat kī jā hai ālam-e-duniyā na kar ġhurūr

sar kāsa-e-gadā hai kisī tājdār kā

bād-e-fanā bhī hai maraz-e-ishq kā asar

dekho ki rañg zard hai mere ġhubār kā

ulfat na kuchh parī se na kuchh huur se hai ishq

mushtāq 'barq' roz-e-azal se hai yaar kā

zer-e-zamin hun tishna-e-didar-e-yar ka

aalam wahi hai aaj talak intizar ka

guzra sharab pine se le kaun dard-e-sar

saqi dimagh kis ko hai ranj-e-KHumar ka

mahshar ke roz bhi na khulegi hamari aankh

sadma uTha chuke hain shab-e-intizar ka

ibrat ki ja hai aalam-e-duniya na kar ghurur

sar kasa-e-gada hai kisi tajdar ka

baad-e-fana bhi hai maraz-e-ishq ka asar

dekho ki rang zard hai mere ghubar ka

ulfat na kuchh pari se na kuchh hur se hai ishq

mushtaq 'barq' roz-e-azal se hai yar ka