zer-e-zamin rahun ki tah-e-asman rahun

zer-e-zamīñ rahūñ ki tah-e-āsmāñ rahūñ

ai justujū-e-yār batā maiñ kahāñ rahūñ

masrūf-e-shukr-e-ne.mat-e-pīr-e-muġhāñ rahūñ

allāh mujh ko yuuñ hī pilā.e jahāñ rahūñ

ghul kar bhī jānib-e-dar-e-pīr-e-muġhāñ rahūñ

mauj-e-sharāb-e-nāb banūñ aur ravāñ rahūñ

yā-rab harīq-e-sho.ala-e-ishq-e-butāñ rahūñ

dozaḳh kī aag le ke muqīm-e-jināñ rahūñ

zālim ye bazm-e-husn kā achchhā rivāj hai

tū sham.a ho ke bhī na jale maiñ tapāñ rahūñ

ai chashm-e-yār maut kā pahlū bachā ke tū

aisī nigāh Daal ki maiñ nīm-jāñ rahūñ

āb-e-hayāt pī ke ḳhizar kyā yahāñ rahe

maiñ Thaan luuñ to kuchh na piyūñ aur yahāñ rahūñ

ban jaa.eñ merī tarz-e-fanā kī kahāniyāñ

aisā miTā ki sāhib-e-nām-o-nishāñ rahūñ

saaqī vo ḳhās-taur kī ta.alīm de mujhe

us mai-kade meñ jā.ūñ to pīr-e-muġhāñ rahūñ

'muztar' vajūd-e-zāt ne ghar tak bhī le liyā

jab ḳhud vo har jagah hai to ab maiñ kahāñ rahūñ

zer-e-zamin rahun ki tah-e-asman rahun

ai justuju-e-yar bata main kahan rahun

masruf-e-shukr-e-nemat-e-pir-e-mughan rahun

allah mujh ko yun hi pilae jahan rahun

ghul kar bhi jaanib-e-dar-e-pir-e-mughan rahun

mauj-e-sharab-e-nab banun aur rawan rahun

ya-rab hariq-e-shoala-e-ishq-e-butan rahun

dozaKH ki aag le ke muqim-e-jinan rahun

zalim ye bazm-e-husn ka achchha riwaj hai

tu shama ho ke bhi na jale main tapan rahun

ai chashm-e-yar maut ka pahlu bacha ke tu

aisi nigah Dal ki main nim-jaan rahun

aab-e-hayat pi ke KHizar kya yahan rahe

main Than lun to kuchh na piyun aur yahan rahun

ban jaen meri tarz-e-fana ki kahaniyan

aisa miTa ki sahib-e-nam-o-nishan rahun

saqi wo KHas-taur ki talim de mujhe

us mai-kade mein jaun to pir-e-mughan rahun

'muztar' wajud-e-zat ne ghar tak bhi le liya

jab KHud wo har jagah hai to ab main kahan rahun