zid hamari dua se hoti hai

zid hamārī du'ā se hotī hai

ham se kyā ab ḳhudā se hotī hai

nāma-bar jā.egā havā se tez

shart bād-e-sabā se hotī hai

na jafā se hai mere dil ko qarār

na tasallī vafā se hotī hai

siine se jab uḌātī hai āñchal

khul ke bād-e-sabā se hotī hai

naz' meñ un se pher leñ āñkheñ

chaar aañkh ab qazā se hotī hai

sach to ye hai ki ranj-o-ġham se najāt

bāda-e-jāñ-fazā se hotī hai

chāragar ab du'ā ko haath uThā.eñ

ki aziyyat davā se hotī hai

donoñ pis pis ke rañg laate haiñ

chheḌ dil se hinā se hotī hai

ai junūñ nok-jhoñk kā hai mazā

ḳhaar se naqsh-e-pā se hotī hai

but ulajhte haiñ roz mujh se 'riyāz'

roz mujh bā-ḳhudā se hotī hai

zid hamari du'a se hoti hai

hum se kya ab KHuda se hoti hai

nama-bar jaega hawa se tez

shart baad-e-saba se hoti hai

na jafa se hai mere dil ko qarar

na tasalli wafa se hoti hai

sine se jab uDati hai aanchal

khul ke baad-e-saba se hoti hai

naz' mein un se pher len aankhen

chaar aankh ab qaza se hoti hai

sach to ye hai ki ranj-o-gham se najat

baada-e-jaan-faza se hoti hai

chaaragar ab du'a ko hath uThaen

ki aziyyat dawa se hoti hai

donon pis pis ke rang late hain

chheD dil se hina se hoti hai

ai junun nok-jhonk ka hai maza

KHar se naqsh-e-pa se hoti hai

but ulajhte hain roz mujh se 'riyaz'

roz mujh ba-KHuda se hoti hai