zist ke aasar ruKHsat hain mohabbat dil mein hai

ziist ke āsār ruḳhsat haiñ mohabbat dil meñ hai

kārvāñ jaatā hai mīr-e-kārvāñ manzil meñ hai

aao dam siine meñ baaqī hai na hasrat dil meñ hai

ab to jo kuchh hai vo chashm-e-muntazar ke til meñ hai

haañ azal se jo muqaddar hai vahī hogā magar

jazba-e-tā.īd-e-qudrat sa.i-e-lā-hāsil meñ hai

jāñ-sitāñ hai husn kyā husn-e-talab kī ehtiyāj

vo to zīnat ke liye ḳhanjar kaf-e-qātil meñ hai

jis kī manzil hai baqā vo jāda-paimā-e-fanā

dil idhar nāqis meñ shāmil hai udhar kāmil meñ hai

tāb-e-ḳhalvat kaun lā saktā hai dil to miT chukā

kis qadar qātil tirā jalva bharī mahfil meñ hai

tū jise chāhe haqīqat kah jise chāhe majāz

ek sūrat jo nazar meñ hai vahī to dil meñ hai

iltijā nāz-āfrīnī ke liye hai varna sun

aarzū ḳhud us kī shāhid hai ki jalva dil meñ hai

ye matā-e-zīst bhī hotī hai 'mānī' nazr-e-maut

ik nazar āñkhoñ meñ hai aur ek hasrat dil meñ hai

zist ke aasar ruKHsat hain mohabbat dil mein hai

karwan jata hai mir-e-karwan manzil mein hai

aao dam sine mein baqi hai na hasrat dil mein hai

ab to jo kuchh hai wo chashm-e-muntazar ke til mein hai

han azal se jo muqaddar hai wahi hoga magar

jazba-e-taid-e-qudrat sai-e-la-hasil mein hai

jaan-sitan hai husn kya husn-e-talab ki ehtiyaj

wo to zinat ke liye KHanjar kaf-e-qatil mein hai

jis ki manzil hai baqa wo jada-paima-e-fana

dil idhar naqis mein shamil hai udhar kaamil mein hai

tab-e-KHalwat kaun la sakta hai dil to miT chuka

kis qadar qatil tera jalwa bhari mahfil mein hai

tu jise chahe haqiqat kah jise chahe majaz

ek surat jo nazar mein hai wahi to dil mein hai

iltija naz-afrini ke liye hai warna sun

aarzu KHud us ki shahid hai ki jalwa dil mein hai

ye mata-e-zist bhi hoti hai 'mani' nazr-e-maut

ek nazar aankhon mein hai aur ek hasrat dil mein hai