zist ki aagahi ka hasil hai

ziist kī āgahī kā hāsil hai

dard hī shā.irī kā hāsil hai

hai ḳhirad bhī ḳhirad ke narġhe meñ

ishq ḳhud gumrahī kā hāsil hai

zindagī kā sabāt hai is meñ

ye jo aañsū hañsī kā hāsil hai

yuuñ tirā paas se guzar jaanā

umr kī be-ruḳhī kā hāsil hai

pūchhtī hai sabā gulistāñ se

phuul kyuuñ tāzgī kā hāsil hai

luuT letī hai qāfile kaise

raat jab bandagī kā hāsil hai

kab ye jānegā aadmī jaane

aadmī aadmī kā hāsil hai

hai tarannum sadā ke pardoñ meñ

naġhmagī bāñsurī kā hāsil hai

soch kā samt rah nahīñ saktī

sher āvārgī kā hāsil hai

is qadar paas aa ke mat baiTho

qurb begānagī kā hāsil hai

tū mire rat-jagoñ kī manzil hai

din kī dīvāngī kā hāsil hai

zist ki aagahi ka hasil hai

dard hi shairi ka hasil hai

hai KHirad bhi KHirad ke narghe mein

ishq KHud gumrahi ka hasil hai

zindagi ka sabaat hai is mein

ye jo aansu hansi ka hasil hai

yun tera pas se guzar jaana

umr ki be-ruKHi ka hasil hai

puchhti hai saba gulistan se

phul kyun tazgi ka hasil hai

luT leti hai qafile kaise

raat jab bandagi ka hasil hai

kab ye jaanega aadmi jaane

aadmi aadmi ka hasil hai

hai tarannum sada ke pardon mein

naghmagi bansuri ka hasil hai

soch ka samt rah nahin sakti

sher aawargi ka hasil hai

is qadar pas aa ke mat baiTho

qurb beganagi ka hasil hai

tu mere rat-jagon ki manzil hai

din ki diwangi ka hasil hai