zist ki har rahguzar par hashr barpa chahiye

ziist kī har rahguzar par hashr barpā chāhiye

dil meñ hañgāma nigāhoñ meñ tamāshā chāhiye

āñsuoñ meñ bhī tirā jalva huvaidā chāhiye

ġham ke tūfānoñ meñ sirf itnā sahārā chāhiye

shām-e-ġham dī hai to ik tābāñ tasavvur de mujhe

maiñ añdherā kyā karūñ mujh ko ujālā chāhiye

merī hastī se barasne lag ga.ī haiñ bijliyāñ

ab tire jalvoñ ke parde par bhī pardā chāhiye

be-niyāzī aaj se karte haiñ ham bhī iḳhtiyār

un ke harbe ko unhīñ par āzmānā chāhiye

saath saath is ko liye phirtī hai kyuuñ terī talāsh

dasht kī tanhā.ī meñ dīvāna tanhā chāhiye

dil par is tartīb se ho bārish-e-lutf-o-karam

sarḳhushī kā naqsh gahrā ġham kā halqa chāhiye

jazb ho kar rah ga.ī haiñ āshiyāñ meñ bijliyāñ

ab falak ko us ke hī sho.aloñ se phūñkā chāhiye

mast ho saktā hai tū 'maḳhmūr' lekin is tarah

aañkh meñ sāġhar lab-e-rañgīñ meñ sahbā chāhiye

zist ki har rahguzar par hashr barpa chahiye

dil mein hangama nigahon mein tamasha chahiye

aansuon mein bhi tera jalwa huwaida chahiye

gham ke tufanon mein sirf itna sahaara chahiye

sham-e-gham di hai to ek taban tasawwur de mujhe

main andhera kya karun mujh ko ujala chahiye

meri hasti se barasne lag gai hain bijliyan

ab tere jalwon ke parde par bhi parda chahiye

be-niyazi aaj se karte hain hum bhi iKHtiyar

un ke harbe ko unhin par aazmana chahiye

sath sath is ko liye phirti hai kyun teri talash

dasht ki tanhai mein diwana tanha chahiye

dil par is tartib se ho barish-e-lutf-o-karam

sarKHushi ka naqsh gahra gham ka halqa chahiye

jazb ho kar rah gai hain aashiyan mein bijliyan

ab falak ko us ke hi shoalon se phunka chahiye

mast ho sakta hai tu 'maKHmur' lekin is tarah

aankh mein saghar lab-e-rangin mein sahba chahiye