زیست کو چاہتوں سے سجایا کہاں

زیست کو چاہتوں سے سجایا کہاں

تم نے روٹھے ہوؤں کو منایا کہاں

روشنی بانٹ کر تیرگی میں رہے

اپنے حصہ کا سورج بچایا کہاں

ایک ہی بار ہوتی ہے دل کی لگی

دل جو ٹوٹا تو پھر سے لگایا کہاں

کب سے آنکھیں بچھی ہیں یہ دہلیز پر

جانے والا پلٹ کر وہ آیا کہاں

سب مکھوٹے کے اندر بہت خوش ہوئے

ہم گرے تو کسی نے اٹھایا کہاں

لوگ ساحل سے لیتے رہے بس مزہ

ڈوبتے کو کسی نے بچایا کہاں

دھوپ میں اب دکھوں کی اکیلے ہیں سب

وہ سروں پہ محبت کا سایا کہاں