zist kya chiz hai aur zist ka gham kya shai hai

ziist kyā chiiz hai aur ziist kā ġham kyā shai hai

tere bandoñ ke liye dair-o-haram kyā shai hai

tū ne ab tak jo kiyā us ko karam hī samjhā

ham ne jaanā hī nahīñ terā sitam kyā shai hai

jo guzartā hai vo rakh detā hai us jā pe jabīñ

kyā batā.ūñ ki tirā naqsh-e-qadam kyā shai hai

ham ne tai kar lī hai taslīm-o-razā kī manzil

ham ko ma.alūm nahīñ dard-o-alam kyā shai hai

rind to rind haiñ ho jaate haiñ zāhid bhī asiir

mus.haf-e-ruḳh pe siyah-zulf kā ḳham kyā shai hai

terī āñkhoñ meñ do-ālam kī ḳhabar paḌhte haiñ

aise rindoñ ke liye sāġhar-e-jam kyā shai hai

maiñ to kamtar huuñ har ik zarra-e-ḳhākī se 'kalīm'

mujh se is vus.at-e-āfāq meñ kam kyā shai hai

zist kya chiz hai aur zist ka gham kya shai hai

tere bandon ke liye dair-o-haram kya shai hai

tu ne ab tak jo kiya us ko karam hi samjha

hum ne jaana hi nahin tera sitam kya shai hai

jo guzarta hai wo rakh deta hai us ja pe jabin

kya bataun ki tera naqsh-e-qadam kya shai hai

hum ne tai kar li hai taslim-o-raza ki manzil

hum ko malum nahin dard-o-alam kya shai hai

rind to rind hain ho jate hain zahid bhi asir

mushaf-e-ruKH pe siyah-zulf ka KHam kya shai hai

teri aankhon mein do-alam ki KHabar paDhte hain

aise rindon ke liye saghar-e-jam kya shai hai

main to kamtar hun har ek zarra-e-KHaki se 'kalim'

mujh se is wusat-e-afaq mein kam kya shai hai