zist mahw-e-sahab ho jaise

ziist mahv-e-sahāb ho jaise

mujh meñ terā shabāb ho jaise

is aqīdat se chup hī rahte haiñ

terī sunñā savāb ho jaise

rakh ke sar pe galī meñ bechī hai

ye mohabbat azaab ho jaise

us kī nazroñ meñ der tak dekhā

merī āñkhoñ kā ḳhvāb ho jaise

tere dar pe sukūñ nahīñ miltā

merī niyyat ḳharāb ho jaise

us ke ḳhat ko sañbhāl rakkhā hai

ik muqaddas kitāb ho jaise

aise rakhā rahā kitāboñ meñ

husn us kā gulāb ho jaise

justujū kī ye maut hai sāhab

terā milnā sarāb ho jaise

zist mahw-e-sahab ho jaise

mujh mein tera shabab ho jaise

is aqidat se chup hi rahte hain

teri sunna sawab ho jaise

rakh ke sar pe gali mein bechi hai

ye mohabbat azab ho jaise

us ki nazron mein der tak dekha

meri aankhon ka KHwab ho jaise

tere dar pe sukun nahin milta

meri niyyat KHarab ho jaise

us ke KHat ko sanbhaal rakkha hai

ek muqaddas kitab ho jaise

aise rakha raha kitabon mein

husn us ka gulab ho jaise

justuju ki ye maut hai sahab

tera milna sarab ho jaise