zist mein kaamyab the kuchh log

ziist meñ kāmyāb the kuchh log

aap apnā javāb the kuchh log

zindagī apnī tīrgī meñ kaTī

saath meñ āftāb the kuchh log

dekh sairāb kar ga.e duniyā

jo bazāhir sarāb the kuchh log

mere 'aiboñ ko Dhāñpte the sadā

yā'nī merā naqāb the kuchh log

jin ke aage nazar na uThtī thī

yuuñ bhī 'izzat-ma.āb the kuchh log

jo farāmosh ho nahīñ paa.e

ham se ḳhāna-ḳharāb the kuchh log

ab bhī āñkheñ gavāhī detī haiñ

ḳhvāb the sirf ḳhvāb the kuchh log

ham jinheñ 'nūr' pīchhe chhoḌ aa.e

nādir-o-lā-javāb the kuchh log

zist mein kaamyab the kuchh log

aap apna jawab the kuchh log

zindagi apni tirgi mein kaTi

sath mein aaftab the kuchh log

dekh sairab kar gae duniya

jo bazahir sarab the kuchh log

mere 'aibon ko Dhanpte the sada

ya'ni mera naqab the kuchh log

jin ke aage nazar na uThti thi

yun bhi 'izzat-maab the kuchh log

jo faramosh ho nahin pae

hum se KHana-KHarab the kuchh log

ab bhi aankhen gawahi deti hain

KHwab the sirf KHwab the kuchh log

hum jinhen 'nur' pichhe chhoD aae

nadir-o-la-jawab the kuchh log