zikr-e-ifa kuchh nahin wada hi wada humse hai

zikr-e-īfā kuchh nahīñ vā'da hī vā'da ham se hai

raat din shaam o sahar imroz fardā ham se hai

ham na kahte the ki ye jaur-o-jafā achchhī nahīñ

pūchh kuchh roz-e-jazā ab tum se hai yā ham se hai

dūsroñ ke kahne sunñe par na tum jaao na ham

tum se bas kahnā hamārā hai tumhārā ham se hai

sharm-e-vasl-e-ġhair se uThtī nahīñ ūñchī nazar

dard-e-sar kaisā ye sab hīla-bahāna ham se hai

kaun sī ḳhūbī hai ham meñ jis pe nāzāñ hoñ 'nasīm'

jo zamāne se burā hai vo bhī achchhā ham se hai

zikr-e-ifa kuchh nahin wa'da hi wa'da hum se hai

raat din sham o sahar imroz farda hum se hai

hum na kahte the ki ye jaur-o-jafa achchhi nahin

puchh kuchh roz-e-jaza ab tum se hai ya hum se hai

dusron ke kahne sunne par na tum jao na hum

tum se bas kahna hamara hai tumhaara hum se hai

sharm-e-wasl-e-ghair se uThti nahin unchi nazar

dard-e-sar kaisa ye sab hila-bahana hum se hai

kaun si KHubi hai hum mein jis pe nazan hon 'nasim'

jo zamane se bura hai wo bhi achchha hum se hai