zikr-e-wafa pe kahte hain teri wafa hai kya

zikr-e-vafā pe kahte haiñ terī vafā hai kyā

ma.alūm hai ki ishq meñ us kī sazā hai kyā

miltā hai be-talab to talab aur duā hai kyā

suniye tarīq shukr kā is ke sivā hai kyā

murda diloñ se koī tavaqqo' fuzūl hai

mar kar bhī aaj tak koī zinda huā hai kyā

tum to tumhīñ ho aa.ina jo chāhe vo kahe

ahl-e-nazar ke sāmne bahrūpiyā hai kyā

bantā hai qalb naqd to hotā hai naqd qalb

vo sīmiyā hai us kī nazar kīmiyā hai kyā

har shai meñ jalva-gar hai tū har shai se be-niyāz

kyūñkar pata chale ki sivā mā-sivā hai kyā

āñkhoñ meñ ashk rang-e-parīda havās gum

ai nāma-bar batā to sahī mājrā hai kyā

do chaar jaam de to diye mohtasib tujhe

tauba kā aur is ke sivā ḳhūñ-bahā hai kyā

har har nafas nafas nahīñ bāñg-e-rahīl hai

ahl-e-ḳhirad ke vāste bāñg-e-darā hai kyā

qaa.em hai us kī samt na laġhzish na iztirāb

merī jabīñ ke sāmne qibla-numā hai kyā

kashtī ḳhudā pe chhoḌ de ai mīr-e-kārvāñ

tūfān kis ko kahte haiñ aur nāḳhudā hai kyā

'shāġhil' qamar ke husn-e-mohabbat kā hai asar

varna sharāb-e-sher meñ baaqī nasha hai kyā

zikr-e-wafa pe kahte hain teri wafa hai kya

malum hai ki ishq mein us ki saza hai kya

milta hai be-talab to talab aur dua hai kya

suniye tariq shukr ka is ke siwa hai kya

murda dilon se koi tawaqqo' fuzul hai

mar kar bhi aaj tak koi zinda hua hai kya

tum to tumhin ho aaina jo chahe wo kahe

ahl-e-nazar ke samne bahrupiya hai kya

banta hai qalb naqd to hota hai naqd qalb

wo simiya hai us ki nazar kimiya hai kya

har shai mein jalwa-gar hai tu har shai se be-niyaz

kyunkar pata chale ki siwa ma-siwa hai kya

aankhon mein ashk rang-e-parida hawas gum

ai nama-bar bata to sahi majra hai kya

do chaar jam de to diye mohtasib tujhe

tauba ka aur is ke siwa KHun-baha hai kya

har har nafas nafas nahin bang-e-rahil hai

ahl-e-KHirad ke waste bang-e-dara hai kya

qaem hai us ki samt na laghzish na iztirab

meri jabin ke samne qibla-numa hai kya

kashti KHuda pe chhoD de ai mir-e-karwan

tufan kis ko kahte hain aur naKHuda hai kya

'shaghil' qamar ke husn-e-mohabbat ka hai asar

warna sharab-e-sher mein baqi nasha hai kya