zikr-e-visal maut ka paigham ho gaya

zikr-e-visāl maut kā paiġhām ho gayā

aisī ḳhushī huī ki mirā kaam ho gayā

maiñ mast-e-chashm-e-sāqī-e-gulfām ho gayā

āñkhoñ kā Dorā Dorā ḳhat-e-jām ho gayā

shab tum kahīñ rahe tumheñ kuchh kaam ho gayā

lo haath laao kyoñ hameñ ilhām ho gayā

kunj-e-lahad meñ roī mirī bekasī mujhe

maTiyā-mahal ke goshe meñ kohrām ho gayā

koThī pe tum chaḌhe jo sar-e-shām be-naqāb

ġhairat se āftāb lab-e-bām ho gayā

be-vaj.h surḳhī-e-lab-e-qātil ġhalat ġhalat

iisā shahīd-e-lazzat-e-dushnām ho gayā

ham ibtidā-e-umr meñ us but pe mar-miTe

āġhāz hī meñ ḳhair se anjām ho gayā

chhāle haiñ teġh-e-yār meñ bismil hai saḳht jaan

sil ho ga.ī use use sarsām ho gayā

hai ye namak kā paas ki kahte haiñ mere zaḳhm

bhar paayā ham ne sab hameñ ārām ho gayā

allāh re ye qadr bikā kauḌiyoñ ke mol

terā shahīd hūroñ meñ nīlām ho gayā

piirī meñ shauq-e-dīd-e-butāñ ho gayā harām

tār-e-nigāh jāma-e-ehrām ho gayā

farmāñ-barī ne da.ave ḳhudā.ī ke kho diye

allāh terī shaan vo but raam ho gayā

bhaḌkā diyā hai soz-e-darūñ chashm-e-zār ne

āñkhoñ kā tel roġhan-e-bādām ho gayā

merī tarah hai tā.ir-e-rang-e-hinā asiir

sayyād tere haath kā ḳhat daam ho gayā

rakh lī ḳhudā ne ḳhanjar-e-qātil se aabrū

'rāsiḳh' balā se jaan ga.ī naam ho gayā

zikr-e-visal maut ka paigham ho gaya

aisi KHushi hui ki mera kaam ho gaya

main mast-e-chashm-e-saqi-e-gulfam ho gaya

aankhon ka Dora Dora KHat-e-jam ho gaya

shab tum kahin rahe tumhein kuchh kaam ho gaya

lo hath lao kyon hamein ilham ho gaya

kunj-e-lahad mein roi meri bekasi mujhe

maTiya-mahal ke goshe mein kohram ho gaya

koThi pe tum chaDhe jo sar-e-sham be-naqab

ghairat se aaftab lab-e-baam ho gaya

be-wajh surKHi-e-lab-e-qatil ghalat ghalat

isa shahid-e-lazzat-e-dushnam ho gaya

hum ibtida-e-umr mein us but pe mar-miTe

aaghaz hi mein KHair se anjam ho gaya

chhaale hain tegh-e-yar mein bismil hai saKHt jaan

sil ho gai use use sarsam ho gaya

hai ye namak ka pas ki kahte hain mere zaKHm

bhar paya hum ne sab hamein aaram ho gaya

allah re ye qadr bika kauDiyon ke mol

tera shahid huron mein nilam ho gaya

piri mein shauq-e-did-e-butan ho gaya haram

tar-e-nigah jama-e-ehram ho gaya

farman-bari ne dawe KHudai ke kho diye

allah teri shan wo but ram ho gaya

bhaDka diya hai soz-e-darun chashm-e-zar ne

aankhon ka tel roghan-e-baadam ho gaya

meri tarah hai tair-e-rang-e-hina asir

sayyaad tere hath ka KHat dam ho gaya

rakh li KHuda ne KHanjar-e-qatil se aabru

'rasiKH' bala se jaan gai nam ho gaya