zikr-o-wird-o-dua se behtar hai

zikr-o-vird-o-duā se behtar hai

mai-kashī har riyā se behtar hai

koī batlāo in hasīnoñ meñ

kaun us be-vafā se behtar hai

dil hī vaalā kuchh us ko jaane hai

qahr terā atā se behtar hai

soz-e-ġham meñ batāiye dil ko

nusḳha ye kīmiyā se behtar hai

kab kisī ishq ke fasāne kī

intihā ibtidā se behtar hai

ai mire chāra-sāz rahne de

ye maraz to shifā se behtar hai

aap itnā to jānte hoñge

lutf jaur-o-jafā se behtar hai

phir vahī lāl-e-nosh-e-lab ai dost

haal kuchh is davā se behtar hai

dushmanī bad sahī magar ye shai

be-ruḳhī kī sazā se behtar hai

ham ko to ye azāb-e-dīda-varī

dosto har jazā se behtar hai

dekh vo ek saada pairāhan

kitne rangīñ-qabā se behtar hai

saaf inkār ai vafā-dushman

is fareb-e-adā se behtar hai

rahzanoñ se ye bach ke chaltā hai

rāh-rau rahnumā se behtar hai

laao 'jābir' vo shai jo duniyā meñ

is dil-e-mubtalā se behtar hai

zikr-o-wird-o-dua se behtar hai

mai-kashi har riya se behtar hai

koi batlao in hasinon mein

kaun us be-wafa se behtar hai

dil hi wala kuchh us ko jaane hai

qahr tera ata se behtar hai

soz-e-gham mein bataiye dil ko

nusKHa ye kimiya se behtar hai

kab kisi ishq ke fasane ki

intiha ibtida se behtar hai

ai mere chaara-saz rahne de

ye maraz to shifa se behtar hai

aap itna to jaante honge

lutf jaur-o-jafa se behtar hai

phir wahi lal-e-nosh-e-lab ai dost

haal kuchh is dawa se behtar hai

dushmani bad sahi magar ye shai

be-ruKHi ki saza se behtar hai

hum ko to ye azab-e-dida-wari

dosto har jaza se behtar hai

dekh wo ek sada pairahan

kitne rangin-qaba se behtar hai

saf inkar ai wafa-dushman

is fareb-e-ada se behtar hai

rahzanon se ye bach ke chalta hai

rah-rau rahnuma se behtar hai

lao 'jabir' wo shai jo duniya mein

is dil-e-mubtala se behtar hai