ذکر ان کا جو ہوا آنکھوں سے برسات ہوئی

ذکر ان کا جو ہوا آنکھوں سے برسات ہوئی

ہاں مرے ساتھ عجب سازش حالات ہوئی

مری خاموشی کو تو اور کوئی نام نہ دے

میں تجھے بھول گیا یہ بھی کوئی بات ہوئی

ساتھ میرے تھے مگر تھی کہیں دزدیدہ نظر

رات محفل میں مرے ساتھ بڑی گھات ہوئی

ایک ہی جن کے دیا تھا وہ فسادوں میں بجھا

ان سے کیا پوچھتے ہو دن ہوا یا رات ہوئی

میں نے سمجھا تھا جسے دوست و معاون اپنا

اسی بے درد کے ہاتھوں سے مجھے مات ہوئی

اپنے خاشاک نشیمن کے لئے کانپ اٹھا

جب بھی طوفاں کی بہاروں میں کہیں بات ہوئی

بعد مدت کے منور ہوئیں آنکھیں مونسؔ

اس پری وش سے اچانک جو ملاقات ہوئی