zinda hain mere KHwab ye kab yaad hai mujhko

zinda haiñ mire ḳhvāb ye kab yaad hai mujh ko

haañ tark-e-mohabbat kā sabab yaad hai mujh ko

tafsīl-e-ināyāt to ab yaad nahīñ hai

par pahlī mulāqāt kī shab yaad hai mujh ko

ḳhushbū kī rifāqat kā nasha TuuT rahā hai

lekin vo safar dād-talab yaad hai mujh ko

ab shaam ke hāthoñ jo giraftār hai sūraj

dopahar meñ thā qahr-o-ġhazab yaad hai mujh ko

aivān mirī ruuh ke raushan kiye jis ne

vo shoḳhi-e-yak-jumbish-e-lab yaad hai mujh ko

kuchh din se muqayyad huuñ maiñ vīrāna-e-jāñ meñ

hālāñki koī shahr-e-tarab yaad hai mujh ko

kyuuñ yaad dilāte ho mujhe chāñdnī rāteñ

paimān-e-vafā tum se hai sab yaad hai mujh ko

vo shaḳhs 'ḳhayāl' aaj jo rū-posh hai mujh meñ

the us meñ kamālāt ajab yaad hai mujh ko

zinda hain mere KHwab ye kab yaad hai mujh ko

han tark-e-mohabbat ka sabab yaad hai mujh ko

tafsil-e-inayat to ab yaad nahin hai

par pahli mulaqat ki shab yaad hai mujh ko

KHushbu ki rifaqat ka nasha TuT raha hai

lekin wo safar dad-talab yaad hai mujh ko

ab sham ke hathon jo giraftar hai suraj

dopahar mein tha qahr-o-ghazab yaad hai mujh ko

aiwan meri ruh ke raushan kiye jis ne

wo shoKHi-e-yak-jumbish-e-lab yaad hai mujh ko

kuchh din se muqayyad hun main virana-e-jaan mein

haalanki koi shahr-e-tarab yaad hai mujh ko

kyun yaad dilate ho mujhe chandni raaten

paiman-e-wafa tum se hai sab yaad hai mujh ko

wo shaKHs 'KHayal' aaj jo ru-posh hai mujh mein

the us mein kamalat ajab yaad hai mujh ko