zinda ho jata hun main jab yar ka aata hai KHat

zinda ho jaatā huuñ maiñ jab yaar kā aatā hai ḳhat

rūh-e-tāza murda-dil ke vāste laatā hai ḳhat

tahniyat-nāma nahīñ ye ai mire paiġhāmbar

us se kahnā ashk-e-ḳhūñ se surḳh ho jaatā hai ḳhat

sar-zamīn-e-qāf par hai fauj-e-zañgī kā hujūm

ye samāñ tere ruḳh-e-anvar pe dikhlātā hai ḳhat

dhamkiyāñ tahrīr hoñ yā zulm kā mazmūn ho

phir ye mere dil ko ai dildār bahlātā hai ḳhat

de ke ḳhat qāsid se vāpas kar liyā ye kah ke haa.e

us ko hotī hai tasallī jab mirā jaatā hai ḳhat

hālat-e-girya meñ nāma-bar kī kuchh hājat nahīñ

ashk ke sailāb meñ bahtā huā jaatā hai ḳhat

kyā shab-e-furqat kī terī be-qarārī darj hai

nāma-bar ko kyuuñ tirā ai 'barq' taḌpātā hai ḳhat

zinda ho jata hun main jab yar ka aata hai KHat

ruh-e-taza murda-dil ke waste lata hai KHat

tahniyat-nama nahin ye ai mere paighambar

us se kahna ashk-e-KHun se surKH ho jata hai KHat

sar-zamin-e-qaf par hai fauj-e-zangi ka hujum

ye saman tere ruKH-e-anwar pe dikhlata hai KHat

dhamkiyan tahrir hon ya zulm ka mazmun ho

phir ye mere dil ko ai dildar bahlata hai KHat

de ke KHat qasid se wapas kar liya ye kah ke hae

us ko hoti hai tasalli jab mera jata hai KHat

haalat-e-girya mein nama-bar ki kuchh hajat nahin

ashk ke sailab mein bahta hua jata hai KHat

kya shab-e-furqat ki teri be-qarari darj hai

nama-bar ko kyun tera ai 'barq' taDpata hai KHat