zinda hun yun ki bas mein meri KHud-kushi nahin

zinda huuñ yuuñ ki bas meñ mirī ḳhud-kushī nahīñ

āḳhir ye aur kyā hai agar bebasī nahīñ

vo dil diyā nasīb ne jis meñ ḳhushī nahīñ

ik chiiz to milī hai magar kaam kī nahīñ

haañ ai shab-e-firāq tujhe jāntā huuñ maiñ

tū sub.h tak rahī to mirī zindagī nahīñ

hargiz fareb-e-rañg-e-masarrat na khā.iye

ye ġham kā naam hai ye haqīqī ḳhushī nahīñ

duniyā kī zīnatoñ meñ nahīñ koī bhī kamī

lekin mirī nazar meñ vo dil-bastagī nahīñ

armān bhī vahīñ haiñ tamannā bhī hai vahī

jis dil se thī ye garmī-e-mahfil vahī nahīñ

hañsne meñ bhī nihāñ haiñ yahāñ nāla-hā-e-dard

pāmāl rasm-e-ijz mirī bandagī nahīñ

ummīd hai javāb-e-ġham-e-ārzū magar

vo kyā kare jise koī ummīd hī nahīñ

va.ade ne tere saare irāde badal diye

hālāñki dard-e-dil meñ zarā bhī kamī nahīñ

maiñ huuñ ki mujh se saarā zamāna ḳhilāf hai

hālāñki jurm-e-ishq se koī barī nahīñ

ibrat-fazā hai ahl-e-zamāna ke vāste

'shaukat' vo dāstāñ jo kisī ne sunī nahīñ

zinda hun yun ki bas mein meri KHud-kushi nahin

aaKHir ye aur kya hai agar bebasi nahin

wo dil diya nasib ne jis mein KHushi nahin

ek chiz to mili hai magar kaam ki nahin

han ai shab-e-firaq tujhe jaanta hun main

tu subh tak rahi to meri zindagi nahin

hargiz fareb-e-rang-e-masarrat na khaiye

ye gham ka nam hai ye haqiqi KHushi nahin

duniya ki zinaton mein nahin koi bhi kami

lekin meri nazar mein wo dil-bastagi nahin

arman bhi wahin hain tamanna bhi hai wahi

jis dil se thi ye garmi-e-mahfil wahi nahin

hansne mein bhi nihan hain yahan nala-ha-e-dard

pamal rasm-e-ijz meri bandagi nahin

ummid hai jawab-e-gham-e-arzu magar

wo kya kare jise koi ummid hi nahin

wade ne tere sare irade badal diye

haalanki dard-e-dil mein zara bhi kami nahin

main hun ki mujh se sara zamana KHilaf hai

haalanki jurm-e-ishq se koi bari nahin

ibrat-faza hai ahl-e-zamana ke waste

'shaukat' wo dastan jo kisi ne suni nahin