zinda rahe to hum ko na pahchan di gai

zinda rahe to ham ko na pahchān dī ga.ī

marne ke ba.ad ḳhuub pazīrā.ī kī ga.ī

kyā kyā sitam hue haiñ mere saath bārhā

dhoke se kitnī baar mirī jaan lī ga.ī

siine se mere noch lī tasvīr-e-yār bhī

shiryān-e-zindagī hī mirī kaaT dī ga.ī

tanhā.iyoñ meñ maiñ terī yādoñ ke saath thā

mahfil sajī to yādoñ se vābastagī ga.ī

is lā-davā maraz kā asar pūchhte ho kyā

dil ne diyā na saath to tanhā.ī bhī ga.ī

dariyā masarratoñ kā to ab suukh hī gayā

ḳhūn-e-jigar piyā to mirī tishnagī ga.ī

detā javāb kyā maiñ takallum kā yaar ke

us kī nigāh-e-nāz mire hoñT sī ga.ī

arbāb-e-ilm-o-fan kī tavajjoh huī to 'shād'

mahfil meñ tere fan ko bhī pahchān dī ga.ī

zinda rahe to hum ko na pahchan di gai

marne ke baad KHub pazirai ki gai

kya kya sitam hue hain mere sath barha

dhoke se kitni bar meri jaan li gai

sine se mere noch li taswir-e-yar bhi

shiryan-e-zindagi hi meri kaT di gai

tanhaiyon mein main teri yaadon ke sath tha

mahfil saji to yaadon se wabastagi gai

is la-dawa maraz ka asar puchhte ho kya

dil ne diya na sath to tanhai bhi gai

dariya masarraton ka to ab sukh hi gaya

KHun-e-jigar piya to meri tishnagi gai

deta jawab kya main takallum ka yar ke

us ki nigah-e-naz mere honT si gai

arbab-e-ilm-o-fan ki tawajjoh hui to 'shad'

mahfil mein tere fan ko bhi pahchan di gai