زندہ رہنے کو بھی لازم ہے سہارا کوئی

زندہ رہنے کو بھی لازم ہے سہارا کوئی

کاش مل جائے غم ہجر کا مارا کوئی

ہے تری ذات سے مجھ کو وہی نسبت جیسے

چاند کے ساتھ چمکتا ہو ستارا کوئی

یہ محبت تو کسی پار نہ لگنے دے گی

یہ وہ دریا ہے نہیں جس کا کنارا کوئی

کیسے جانو گے کہ راتوں کا تڑپنا کیا ہے

تم سے بچھڑا جو نہیں جان سے پیارا کوئی

ہم محبت میں بھی قائل رہے یکتائی کے

ہم نے رکھا ہی نہیں دل میں دوبارہ کوئی

سوچتی ہوں ترے پہلو میں جو بیٹھا ہوگا

کیسا ہوگا وہ پری وش وہ تمہارا کوئی

کون بانٹے گا مرے ساتھ مری تنہائی

ڈھونڈ کے لا دو مجھے زیست سے ہارا کوئی