zinda rahte dil ka dard sunane wale

zinda rahte dil kā dard sunāne vaale

kitne achchhe hote haiñ mar jaane vaale

mar jaate hī duniyā ko ḳhūbī dikhtī hai

badal raheñ haiñ qisse bhī batlāne vaale

ek shajar ne vīrāne meñ umr guzārī

suukh gayā to aa.e use girāne vaale

angāroñ ko paar kiyā tab markaz aaya

kitne haiñ mujh aise pair jalāne vaale

ik dariyā sailāb banā to aafat aa.ī

ab tak jaane kahāñ the bāñdh banāne vaale

ye duniyā keval matlab se hī saath rahī hai

dekho phūñk rahe haiñ pyaar jatāne vaale

sab kahte haiñ tū vāpas aa jā ghar apne

kab aate haiñ rāh-e-jannat jaane vaale

haañ maiñ pāgal huuñ shā.ir huuñ duur raho tum

thak kar mujh se haar ga.e samjhāne vaale

zinda rahte dil ka dard sunane wale

kitne achchhe hote hain mar jaane wale

mar jate hi duniya ko KHubi dikhti hai

badal rahen hain qisse bhi batlane wale

ek shajar ne virane mein umr guzari

sukh gaya to aae use girane wale

angaron ko par kiya tab markaz aaya

kitne hain mujh aise pair jalane wale

ek dariya sailab bana to aafat aai

ab tak jaane kahan the bandh banane wale

ye duniya kewal matlab se hi sath rahi hai

dekho phunk rahe hain pyar jatane wale

sab kahte hain tu wapas aa ja ghar apne

kab aate hain rah-e-jannat jaane wale

han main pagal hun shair hun dur raho tum

thak kar mujh se haar gae samjhane wale