zindan mein hun main shahr-e-nigaran se kya mujhe

zindāñ meñ huuñ maiñ shahr-e-nigārāñ se kyā mujhe

is gulsitāñ kī bād-e-bahārāñ se kyā mujhe

vo kaam apnā kar hī gayā ehtiyāt se

yuuñ dekhte ho dīda-e-hairāñ se kyā mujhe

vīrāniyāñ haiñ gor-e-ġharībāñ sī har taraf

lenā hai aaj shahr-e-daraḳhshāñ se kyā mujhe

chhūne lage haiñ haath mire mehr-o-māh ko

mahfil kī āb-o-tāb-e-charāġhāñ se kyā mujhe

hāthoñ ko zaḳhm qalb ko māyūsiyāñ milīñ

is ke sivā milā hai gulistāñ se kyā mujhe

'mohsin' shab-e-siyāh kā maarā huā huuñ maiñ

ab vāsta ho sham-e-shabistāñ se kyā mujhe

zindan mein hun main shahr-e-nigaran se kya mujhe

is gulsitan ki baad-e-bahaaran se kya mujhe

wo kaam apna kar hi gaya ehtiyat se

yun dekhte ho dida-e-hairan se kya mujhe

viraniyan hain gor-e-ghariban si har taraf

lena hai aaj shahr-e-daraKHshan se kya mujhe

chhune lage hain hath mere mehr-o-mah ko

mahfil ki aab-o-tab-e-charaghan se kya mujhe

hathon ko zaKHm qalb ko mayusiyan milin

is ke siwa mila hai gulistan se kya mujhe

'mohsin' shab-e-siyah ka mara hua hun main

ab wasta ho sham-e-shabistan se kya mujhe