zindagani habab ki si hai

zindagānī habāb kī sī hai

hast-o-būd apnī ḳhvāb kī sī hai

hai har ik saañs ik varaq jaisā

ziist apnī kitāb kī sī hai

un kī mastāna añkhḌiyāñ tauba

koī dūkāñ sharāb kī sī hai

tishna-kām-e-havas tū kyā jaane

are duniyā sarāb kī sī hai

chāk-e-zātī kā aib bhī hai kamāl

kyā qabā bhī gulāb kī sī hai

chheḌ mujh ko ko rāz-e-dil sun lo

merī hālat rabāb kī sī hai

hiddat-e-nāz-e-ġham ma.āz-allāh

dil kī hālat kabāb kī sī hai

dushman-e-hosh hai shabāb kā daur

is meñ mastī sharāb kī sī hai

kyoñ na ḳhūñ-reziyāñ hoñ duniyā meñ

aamad ik inqalāb kī sī hai

ishq meñ tere talḳhī-e-ġham bhī

mujh ko ik shahd-e-nāb kī sī hai

ziist meñ marg hai to marg meñ ziist

hālat ik mauj-e-āb kī sī hai

sifat-o-zāt ek haiñ dar-asl

nisbat āb-o-habāb kī sī hai

baḳhshish ahl-e-karam kī ai 'zā.iq'

tābish-e-āftāb kī sī hai

zindagani habab ki si hai

hast-o-bud apni KHwab ki si hai

hai har ek sans ek waraq jaisa

zist apni kitab ki si hai

un ki mastana ankhDiyan tauba

koi dukan sharab ki si hai

tishna-kaam-e-hawas tu kya jaane

are duniya sarab ki si hai

chaak-e-zati ka aib bhi hai kamal

kya qaba bhi gulab ki si hai

chheD mujh ko ko raaz-e-dil sun lo

meri haalat rabab ki si hai

hiddat-e-naz-e-gham maaz-allah

dil ki haalat kabab ki si hai

dushman-e-hosh hai shabab ka daur

is mein masti sharab ki si hai

kyon na KHun-reziyan hon duniya mein

aamad ek inqalab ki si hai

ishq mein tere talKHi-e-gham bhi

mujh ko ek shahd-e-nab ki si hai

zist mein marg hai to marg mein zist

haalat ek mauj-e-ab ki si hai

sifat-o-zat ek hain dar-asl

nisbat aab-o-habab ki si hai

baKHshish ahl-e-karam ki ai 'zaiq'

tabish-e-aftab ki si hai