zindagani jab hamein ras aaegi

zindagānī jab hameñ raas aa.egī

dekh lenā maut bhī aa jā.egī

vo nazar jab bhī karam farmā.egī

lāziman duniyā hameñ apnā.egī

mere ghar se shām-e-ġham kab jā.egī

aaj jā.egī to kal phir aa.egī

kaun zinda rah sakegā bin tire

kis se ye tohmat uThā.ī jā.egī

kaun jaane kyā ho phir tauba kā hashr

mai-kade par jab ghaTā ghir aa.egī

ek din ham ḳhaak meñ mil jā.eñge

har haqīqat dāstāñ ban jā.egī

kyā karūñ un kī nasīhat kā gila

dostoñ se aur kyā ban aa.egī

maiñ na kahtā thā na pūchheñ merā haal

aap ko sun kar hañsī aa jā.egī

gardish-e-daurāñ ko samjhā dījiye

ham se uljhegī to muñh kī khā.egī

vo miTāne ko haiñ ai 'āsī' hameñ

ye ḳhalish bhī ek din miT jā.egī

zindagani jab hamein ras aaegi

dekh lena maut bhi aa jaegi

wo nazar jab bhi karam farmaegi

laziman duniya hamein apnaegi

mere ghar se sham-e-gham kab jaegi

aaj jaegi to kal phir aaegi

kaun zinda rah sakega bin tere

kis se ye tohmat uThai jaegi

kaun jaane kya ho phir tauba ka hashr

mai-kade par jab ghaTa ghir aaegi

ek din hum KHak mein mil jaenge

har haqiqat dastan ban jaegi

kya karun un ki nasihat ka gila

doston se aur kya ban aaegi

main na kahta tha na puchhen mera haal

aap ko sun kar hansi aa jaegi

gardish-e-dauran ko samjha dijiye

hum se uljhegi to munh ki khaegi

wo miTane ko hain ai 'asi' hamein

ye KHalish bhi ek din miT jaegi