zindagani ka bana lije chalan husn-e-suluk

zindagānī kā banā liije chalan husn-e-sulūk

log jaise bhī hoñ rakhiye husn-e-zan husn-e-sulūk

sa.i-e-paiham ho ki har din zindagī kā ḳhvāb ho

har amal husn-e-amal ho har jatan husn-e-sulūk

rahbaro fitna-garo ġhārat-garān-e-dīñ suno

al-hazar ab chāhtā hai ye vatan husn-e-sulūk

dhuup hai to kaisā shikva aap ḳhud saaya baneñ

be-ġharaz karte haiñ sab sarv-o-saman husn-e-sulūk

muskurā.eñ rañj bāñTeñ aur shajar-kārī kareñ

chāhte haiñ aap se koh-o-daman husn-e-sulūk

ham burā.ī ko burā.ī se badal sakte nahīñ

rāh-rau ho yā ho koī rāhzan husn-e-sulūk

aap bhī 'ahmad' faqat nāseh na baniye kiije kuchh

har adā husn-e-adā ho har suḳhan husn-e-sulūk

zindagani ka bana lije chalan husn-e-suluk

log jaise bhi hon rakhiye husn-e-zan husn-e-suluk

sai-e-paiham ho ki har din zindagi ka KHwab ho

har amal husn-e-amal ho har jatan husn-e-suluk

rahbaro fitna-garo ghaarat-garan-e-din suno

al-hazar ab chahta hai ye watan husn-e-suluk

dhup hai to kaisa shikwa aap KHud saya banen

be-gharaz karte hain sab sarw-o-saman husn-e-suluk

muskuraen ranj banTen aur shajar-kari karen

chahte hain aap se koh-o-daman husn-e-suluk

hum burai ko burai se badal sakte nahin

rah-rau ho ya ho koi rahzan husn-e-suluk

aap bhi 'ahmad' faqat naseh na baniye kije kuchh

har ada husn-e-ada ho har suKHan husn-e-suluk