zindagani ki masarrat bhi juda humse hui

zindagānī kī masarrat bhī judā ham se huī

jurm ye thā ki na tardīd-e-ḳhudā ham se huī

ham gunahgār sahī phir bhī tire bande haiñ

har shab-e-ġham meñ ḳhudā terī sanā ham se huī

sar uThāte hue chalte rahe sahrāoñ meñ

kisī hālat meñ na majrūh anā ham se huī

koī aisā thā jo kahtā na buroñ ko bhī burā

bas tire shahr meñ ye rasm adā ham se huī

ham to bas tere sahāre hī chale haiñ ab tak

jaane kyoñ aaj tū bargashta sabā ham se huī

half le kar jo kaTahre meñ ga.e ham 'ḳhurshīd'

terā hī naam liyā itnī ḳhatā ham se huī

zindagani ki masarrat bhi juda hum se hui

jurm ye tha ki na tardid-e-KHuda hum se hui

hum gunahgar sahi phir bhi tere bande hain

har shab-e-gham mein KHuda teri sana hum se hui

sar uThate hue chalte rahe sahraon mein

kisi haalat mein na majruh ana hum se hui

koi aisa tha jo kahta na buron ko bhi bura

bas tere shahr mein ye rasm ada hum se hui

hum to bas tere sahaare hi chale hain ab tak

jaane kyon aaj tu bargashta saba hum se hui

half le kar jo kaTahre mein gae hum 'KHurshid'

tera hi nam liya itni KHata hum se hui