zindagi aa tera arman badal kar dekhen

zindagī aa tirā armān badal kar dekheñ

dil meñ hai jo mire mehmān badal kar dekheñ

sham-e-ummīd ke mānind milā hai koī

hijr kī dhuup kā unvān badal kar dekheñ

us ne baḳhshā hameñ e.azāz shanāsā.ī kā

kyuuñ na ham apnī hī pahchān badal kar dekheñ

merī āñkhoñ meñ na.e rañg ubhar aa.e haiñ

sā.īñ ghar kā sar-o-sāmān badal kar dekheñ

aql gul ḳhud ko hai samjhe hue jo ḳhāk-nashīñ

us ke dil kā ye kabhī maan badal kar dekheñ

dosh dete haiñ har ik baat pe hālāt ko jo

apne andar kā vo insān badal kar dekheñ

fan kī duniyā meñ na.ī sub.h kā sūraj bo kar

aao ham apnā gulistān badal kar dekheñ

ham ujālā haiñ ujāloñ se mohabbat hai hameñ

fann-e-taḳhlīq tirī shaan badal kar dekheñ

zehn kī jhiil meñ khil uTThā mohabbat kā kañval

dil meñ jo ġham kā hai tūfān badal kar dekheñ

'rūmī' puujā vo mukammal nahīñ hone detā

man ke andar hai jo bhagvān badal kar dekheñ

zindagi aa tera arman badal kar dekhen

dil mein hai jo mere mehman badal kar dekhen

sham-e-ummid ke manind mila hai koi

hijr ki dhup ka unwan badal kar dekhen

us ne baKHsha hamein eazaz shanasai ka

kyun na hum apni hi pahchan badal kar dekhen

meri aankhon mein nae rang ubhar aae hain

sain ghar ka sar-o-saman badal kar dekhen

aql gul KHud ko hai samjhe hue jo KHak-nashin

us ke dil ka ye kabhi man badal kar dekhen

dosh dete hain har ek baat pe haalat ko jo

apne andar ka wo insan badal kar dekhen

fan ki duniya mein nai subh ka suraj bo kar

aao hum apna gulistan badal kar dekhen

hum ujala hain ujalon se mohabbat hai hamein

fann-e-taKHliq teri shan badal kar dekhen

zehn ki jhil mein khil uTTha mohabbat ka kanwal

dil mein jo gham ka hai tufan badal kar dekhen

'rumi' puja wo mukammal nahin hone deta

man ke andar hai jo bhagwan badal kar dekhen