zindagi aise gharon se to khanDar achchhe the

zindagī aise gharoñ se to khañDar achchhe the

jin kī dīvār hī achchhī thī na dar achchhe the

un kī jannat meñ rahe ham to ye ehsās huā

apne vīrānoñ meñ ham ḳhāk-basar achchhe the

band thī ham pe vahī rāh-e-gulistāñ ki jahāñ

saaya karte hue do-rūya shajar achchhe the

umr kī andhī guphāoñ kā safar lambā thā

vo to kahiye ki rafīqān-e-safar achchhe the

kahīñ sahrā kahīñ jañgal to kahīñ dariyā the

mere hisse kī zamīñ tere safar achchhe the

sair-e-duniyā se jo lauTe to ye jaanā ham ne

shahr-e-'ġhālib' tire ḳhūbāñ-e-nazar achchhe the

zindagi aise gharon se to khanDar achchhe the

jin ki diwar hi achchhi thi na dar achchhe the

un ki jannat mein rahe hum to ye ehsas hua

apne viranon mein hum KHak-basar achchhe the

band thi hum pe wahi rah-e-gulistan ki jahan

saya karte hue do-ruya shajar achchhe the

umr ki andhi guphaon ka safar lamba tha

wo to kahiye ki rafiqan-e-safar achchhe the

kahin sahra kahin jangal to kahin dariya the

mere hisse ki zamin tere safar achchhe the

sair-e-duniya se jo lauTe to ye jaana hum ne

shahr-e-'ghaalib' tere KHuban-e-nazar achchhe the