zindagi bandhi gai hai jab hawa ki Dor se

zindagī bāñdhī ga.ī hai jab havā kī Dor se

maiñ ne tūfāñ ko dabā rakhā hai apnī or se

roz-o-shab kī aaḌī tirchhī sī ka.ī parchhā.iyāñ

shaam jaise baiThī ho kājal lagā kar bhor se

thartharāte hoñT par kuchh TūTte alfāz haiñ

dil dhaḌaktā jā rahā hai aur bhī kuchh zor se

surḳh āñkhoñ kī lakīroñ ne nichoḌā dil kā ḳhuuñ

ret ke zarroñ ko sūraj dekhtā hai ġhaur se

zulm kī tāqat alag hai sabr kī tāqat alag

dard kā rishta vafā se hai sitam kā jaur se

kaun suntā hai kisī key saañs ke naġhmoñ key dhun

sab ne apnā raag chheḌā apne apne taur se

vaqt gardish kar rahā hai suuī kī ik nok par

ham bhī laḌ kar jī rahe haiñ kaise nāzuk daur se

zindagi bandhi gai hai jab hawa ki Dor se

main ne tufan ko daba rakha hai apni or se

roz-o-shab ki aaDi tirchhi si kai parchhaiyan

sham jaise baiThi ho kajal laga kar bhor se

thartharaate honT par kuchh TuTte alfaz hain

dil dhaDakta ja raha hai aur bhi kuchh zor se

surKH aankhon ki lakiron ne nichoDa dil ka KHun

ret ke zarron ko suraj dekhta hai ghaur se

zulm ki taqat alag hai sabr ki taqat alag

dard ka rishta wafa se hai sitam ka jaur se

kaun sunta hai kisi key sans ke naghmon key dhun

sab ne apna rag chheDa apne apne taur se

waqt gardish kar raha hai sui ki ek nok par

hum bhi laD kar ji rahe hain kaise nazuk daur se