zindagi baqi hai ab do chaar din

zindagī baaqī hai ab do chaar din

gin rahā hai ye tirā bīmār din

shoḳhiyoñ se kījiye pāmāl dil

haiñ tumhāre naaz ke sarkār din

vo jo the ahd-e-javānī ke mirī

kaise guzre barq kī raftār din

aap ne jab se nigāheñ pher liiñ

ho ga.e haiñ kāTne dushvār din

maah hai mūbāf nayyar ḳhāl-e-ruḳh

zulf shab hai aur hai ruḳhsār din

tum ulaT do apne ruḳh se jo naqāb

ho shabistāñ meñ abhī bedār din

ashk piite haiñ ye baade kī jagah

kāTte haiñ is tarah mai-ḳhvār din

iid ke din mil rahe haiñ vo gale

aisā aa.e din meñ sau sau baar din

dar pe haiñ nazreñ kabhī haiñ baam par

yuuñ guzartā hai tah-e-dīvār din

sang-dil itnī bhī ai shīrīñ na ban

kohkan kaaTe sar-e-kohsār din

tum baham shīr-o-shakar ho kar raho

yuuñ guzāro kāfir-o-dīñ-dār din

intizār-e-yūsuf-e-dildār meñ

roz guzre hai sar-e-bāzār din

yād-e-but hai aur qashqa bar-jabīñ

kāTtā huuñ bāñdh kar zunnār din

jab se saudā chashm-o-abrū kā huā

tiir haiñ rāteñ mujhe talvār din

zindagī 'jauhar' thī jab rashk-e-bahār

vaah kyā apne the vo gulzār din

zindagi baqi hai ab do chaar din

gin raha hai ye tera bimar din

shoKHiyon se kijiye pamal dil

hain tumhaare naz ke sarkar din

wo jo the ahd-e-jawani ke meri

kaise guzre barq ki raftar din

aap ne jab se nigahen pher lin

ho gae hain kaTne dushwar din

mah hai mubaf nayyar KHal-e-ruKH

zulf shab hai aur hai ruKHsar din

tum ulaT do apne ruKH se jo naqab

ho shabistan mein abhi bedar din

ashk pite hain ye baade ki jagah

kaTte hain is tarah mai-KHwar din

id ke din mil rahe hain wo gale

aisa aae din mein sau sau bar din

dar pe hain nazren kabhi hain baam par

yun guzarta hai tah-e-diwar din

sang-dil itni bhi ai shirin na ban

kohkan kaTe sar-e-kohsar din

tum baham shir-o-shakar ho kar raho

yun guzaro kafir-o-din-dar din

intizar-e-yusuf-e-dildar mein

roz guzre hai sar-e-bazar din

yaad-e-but hai aur qashqa bar-jabin

kaTta hun bandh kar zunnar din

jab se sauda chashm-o-abru ka hua

tir hain raaten mujhe talwar din

zindagi 'jauhar' thi jab rashk-e-bahaar

wah kya apne the wo gulzar din