zindagi bach nikalti hai har jang mein waqt ke war se

zindagī bach nikaltī hai har jañg meñ vaqt ke vaar se

phir Tapaktā hai ik baar lamhoñ kā ḳhuuñ saañs kī dhaar se

kitne shahroñ kī ālūdgī ko havā ne ikaTThā kiyā

aur marne pe aa.e to ham mar ga.e gul kī mahkār se

dard vaale to īmān le aa.eñ haiñ lafz par sāhibo!

lafz kyā shai hai pūchho ye fankār se yā azā-dār se

Dūbte vaqt māñjhī se dariyā ne bā-dīda-e-nam kahā

koī kashtī kināre lagī hai kabhī ek patvār se!

dil yahī chāhtā thā 'shanāvar' sitāroñ kā muñh noch luuñ!

shahr ko maiñ ne dekhā thā ik raat masjid ke mīnār se

zindagi bach nikalti hai har jang mein waqt ke war se

phir Tapakta hai ek bar lamhon ka KHun sans ki dhaar se

kitne shahron ki aaludgi ko hawa ne ikaTTha kiya

aur marne pe aae to hum mar gae gul ki mahkar se

dard wale to iman le aaen hain lafz par sahibo!

lafz kya shai hai puchho ye fankar se ya aza-dar se

Dubte waqt manjhi se dariya ne ba-dida-e-nam kaha

koi kashti kinare lagi hai kabhi ek patwar se!

dil yahi chahta tha 'shanawar' sitaron ka munh noch lun!

shahr ko main ne dekha tha ek raat masjid ke minar se