زندگی بخش ثمر شاخ میں کم آتے ہیں

زندگی بخش ثمر شاخ میں کم آتے ہیں

اب کے موسم میں جو آتے ہیں تو غم آتے ہیں

دین و ایماں سے غرض ہے نہ روایات کا پاس

تیل کی کھوج میں یورپ کے صنم آتے ہیں

دل کی وحشت نہ گئی زخم کا ٹانکا نہ کھلا

اس کی محفل سے بھی بادیدۂ نم آتے ہیں

با خبر اے چمن ہند کے خوش رنگ طیور

دانہ و دام لئے اہل کرم آتے ہیں

شب گزیدوں سے کوئی جا کے کہو مت گھبرائیں

پرچم صبح اٹھائے ہوئے ہم آتے ہیں

کس گھرانے سے تعلق ہے ہم اہل دل کا

خیر مقدم کے لئے دیر و حرم آتے ہیں

جب سے بازار میں بکنے لگے فن کار نیازؔ

مجھ سے ارباب قلم شہر میں کم آتے ہیں